Актуелниот шампион Струмица му го нанесе првиот пораз сезонава на Штип УГД

Вистински одбојкарски трилер се одигра во Штип, каде актуелниот шампион Струмица 47&72 успеа да режира епски пресврт против лидерот на табелата, Штип УГД. Во дербито на 9. коло, струмичани славеа со 3:2 (19:25, 21:25, 25:23, 25:23, 15:12), прекинувајќи ја серијата без пораз на домаќинот.

Штипјани започнаа фуриозно, самоуверено контролирајќи ги првите два сета за високо водство од 2:0. Се чинеше дека бодовите остануваат дома, но шампионот не мислеше така. Предводени од младиот 18-годишен бисер Јован Милев, и со искуството на репрезентативците Кристијан Илијев и Владо Милев, гостите се „ресетираа“ и израмнија на 2:2.

Кулминацијата се случи во тај-брејкот, каде Струмица влезе незапирливо (6:1, па 9:4) и рутински го приведе мечот кон крај.

Јован Милев со 20 поени беше херојот на Струмица, а одлична поддршка имаше од Илијев со 17 поени. Кај домаќините, и покрај поразот, блескаше Махди Задмард со натпреварот-рекорд од 22 поени, додека Стојан Илиев запиша 18. Штип УГД останува лидер, но сега разликата со второпласираната Струмица е стопена на само еден бод.