Даскаловски: Ја чувствувам енергијата на Струмица за продолжување на развојот

Претседателот на СДСМ, Венко Филипче, и актуелниот претседател на Советот на општина Струмица и кандидат за градоначалник од редовите на СДСМ, Марјан Даскаловски, вчера остварија непосредна средба со граѓаните на Струмица. За време на прошетката низ градските улици, тие разговараа со струмичани за нивните секојдневни потреби, предизвици и предлози за унапредување на животот во општината.

Кандидатот за градоначалник, Даскаловски, го истакна задоволството од позитивната енергија и конструктивните разговори со сограѓаните. „Она што најмногу ме радува е што ја чувствувам позитивната енергија кај луѓето. Енергија на верба дека Струмица може и мора да продолжи по патот на развој, енергија која дава сила и инспирација за сите нас што сме подготвени да вложиме труд и работа за иднината на нашата општина“, изјави Даскаловски.

Тој нагласи дека претстојниот период ќе биде исполнет со многу работа, нови проекти и идеи насочени кон подобрување на заедницата. Според него, видливи резултати може да се постигнат само со заедничка работа и искрена заложба на локалната власт и граѓаните.

„Струмица отсекогаш била симбол на непокор, на граѓани кои гордо стојат зад своите вредности и визија за подобро утре. Таа непокорност денес е наша сила – сила што нè мотивира да одиме напред и да ја изградиме општината каква што сите ја заслужуваме“, додаде Даскаловски, осврнувајќи се на карактерот на градот и неговите жители како инспирација за иден развој.

Средбата е дел од тековните активности на раководството на СДСМ за директна комуникација со граѓаните ширум државата.