Фондацијата „Елеуса“ организира „Концерт на добрината“ за помош на деветгодишната Тијана Дунгевска

Фондација „Елеуса“ најави организација на „Концерт на добрината“ со цел да се соберат неопходните средства за лекувањето на деветгодишната Тијана Дунгевска. Малото девојче веќе речиси една година води тешка битка со сериозна болест, а трошоците за лекувањето претставуваат голем товар за нејзиното семејство.

Под мотото „Секоја помош, без разлика колку е мала, значи надеж и нова шанса за малата Тијана“, фондацијата ги повикува сите хумани граѓани да се придружат на настанот и со своите донации да помогнат во обезбедувањето на неопходните финансии за продолжување на лекувањето на Тијана.

„Концертот на добрината“ ќе биде настан со отворен влез, а сите присутни ќе имаат можност да донираат средства во специјално поставени кутии за донации, во согласност со своите можности. Целта на овој хуманитарен настан е да се покаже солидарност и заедништво во најтешките моменти и да се испрати порака за поддршка до Тијана и нејзиното семејство.

Фондацијата „Елеуса“ е позната по својата посветеност во организирањето на хуманитарни настани и акции за помош на лица на кои им е најпотребна. Преку своите активности, тие континуирано работат на подигање на свеста за потребите на заедницата и поттикнување на филантропијата кај граѓаните.

Настанот ќе се одржи на 3 септември, среда, со почеток од 20:00 часот во Амфитеатарот.

Сите заинтересирани граѓани и општествено одговорни компании кои сакаат да дадат свој придонес во лекувањето на Тијана Дунгевска, можат да добијат повеќе информации преку официјалните канали на Фондацијата „Елеуса“.