Костадинов го замрзнува членството во СДСМ

Актуелниот градоначалник на Струмица, Костадин Костадинов, денеска објави дека се повлекува од понатамошна кандидатура за локалните избори. Во емотивно обраќање, Костадинов истакна дека неговата партиска припадност во СДСМ е „замрзната“ поради несогласување со актуелното раководство. Тој најави формирање на ново интерпартиско движење по локалните избори.

Костадинов, кој нема загубено избори во изминатите 11 години, ја објасни својата одлука како чин на чесност. „Во сегашната политичка слика, мојата кандидатура – од било која партија – е бесмислена“, изјави тој, потенцирајќи дека нема вистинска понуда, суштинска дебата или нова визија за градот. Според него, победа без предизвик би била „пораз што не го прифаќам“.

Костадинов го истакна своето богато градоначалничко портфолио, набројувајќи ги постигнувањата како што се: Струмица како прв град на Балканот со целосно електричен јавен превоз, развој на велосипедски патеки, изградба на најголемиот зелен пазар во Македонија, нов генерален урбанистички план, завршени канализации во селата, и најниски долгови со највисок кредитен рејтинг меѓу општините.

И покрај повлекувањето, Костадинов нагласи дека останува социјалдемократ, верен на вредностите на солидарноста и еднаквоста. Сепак, јавно изрази разочарување од „немање став, немање храброст, немање волја за фронт“ од страна на партиското раководство.

Во следните месеци, Костадинов ќе започне со креирање на „ново интерпартиско делување“ кое ќе биде претставено по локалните избори. Целта е да се обединат авторитети кои недостасуваат во СДСМ и да се привлечат младите.

„Ова не е крај. Ова е гест“, порача Костадинов, нарекувајќи ја својата одлука „гест на зрелост, на чесност, на демократија“. Тој верува дека Струмица ќе продолжи да напредува и без него како носител, бидејќи „визијата не е човек. Визијата е градот“.

Костадинов најави дека неговата конечна политичка одлука за идното делување ќе биде објавена по завршувањето на локалните избори.