Марјан Даскаловски, кандидат за градоначалник на Струмица од СДСМ: Победата на фудбалската репрезентација е инспирација и патоказ за нашите локални спортски политики
По повод убедливата победа на македонската фудбалска репрезентација над Лихтенштајн со резултат 5:0, кандидатот за градоначалник на општина Струмица од редовите на СДСМ, Марјан Даскаловски, организираше заедничко следење на натпреварот со млади спортисти и навивачи од градот.
Тој истакна дека ваквите спортски успеси не се само моменти на радост, туку и значаен дел од градењето на националниот идентитет, гордоста и заедништвото.
„Денешната победа на репрезентацијата е симбол за тоа како со срце, дисциплина и тимска работа може да се постигнат резултати кои ги надминуваат сите очекувања. Токму овие вредности сакаме да ги поттикнеме кај младите во нашата општина“, изјави Даскаловски.
Според него, успесите на националниот тим се најголемата инспирација за децата и младите спортисти, учејќи ги на упорност, тимски дух и честа да се претставува својата земја.
Во својата објава на социјалнитемрежи, Даскаловски го претстави и својот план за развој на локалниот спорт, нагласувајќи дека негов клучен приоритет како иден градоначалник ќе биде создавањето услови за успех на младите спортисти во Струмица.
„Мојата цел е да создадеме врвни услови токму овде, на локално ниво, каде што секое дете ќе може да го следи патот на успехот. Планираме конкретни инвестиции во спортот, системска поддршка за младите таленти и изградба на современа инфраструктура. Ова не е трошок, туку вложување во иднината на Струмица и на целата држава. Македонија има сила, има младост и има иднина, а наша должност е таа иднина да ја градиме заедно, со истата верба со која денес ја бодревме нашата репрезентација“, заклучи кандидатот за градоначалник од редовите на СДСМ, Марјан Даскаловски.
