Еуромакс донираше приклучна механизација на жени фармери во Босилово и Ново Село
Донацијата се состои од систем за греење на стакларник за декоративни цвеќиња, култиватори за трактор, фреза од 1,2 метри, редосеалка за зрнести плодови, рачен мотокултиватор, култиватор за трактор, две тракторски фреза од 1,6 метри, рачна моторна фреза, тракторска корпа за носење на фрезата, лентирачка, танирачи и материјали за одгледување цвеќиња за жени фармери од селата Ново Село, Смоларе, Иловица, Еднокуќево, Босилово и Радово во општините Босилово и Ново Село.
Еуромакс почна со реализација на ветената поддршка на локални проекти во Подогражденскиот регион, за кои Бордот на директори на компанијата обезбеди вкупен фонд од еден милион евра. Првата поддршка е за асоцијацијата Слоу фуд Огражден која веднаш се пријави на повикот на компанијата и обезбеди приклучна земјоделска механизација и опрема за жени фармерки во општините Босилово и Ново Село.
Сашко Поповски од невладината организација Слоу Фуд Огражден посочи дека механизацијата и опремата се набавени преку локални дистрибутери што ја олеснува и дистрибуцијата понатаму до корисниците на опремата.
“Донацијата што ја обезбедивме преку повикот на Еуромакс Ресоурцес се состои од приклучна земјоделска механизација и опрема. Дел од механизацијата и опремата е веќе доставена до дел од жените кои се членки во нашето здружение, а кои покажаа интерес да бидат дел од оваа активност. Дел од опремата е поголема и допрва ќе ја добијат, но она што за нас е особено важно е што оваа механизација и опрема останува да ја користат трајно за развој на индивидуалното земјоделство, фармерството и пред сẻ во развојот на женското претприемништво во регионов“, изјави Поповски.
Поповски потенцираше дека со донацијата се опфатени сите дејности – производство на цвеќиња, сточарство, овоштарство, полјоделие, а идејата е оваа поддршка да биде основа за подигање на женското индивидуално фармерство, надевајќи се дека ќе им помогне да го зголемат производството и да си отворат нови пазари за пласман на производите.
Никола Гулев, главен директор за финансии во Еуромакс Ресоурцес, кој ја предаде донацијата на невладината организација Слоу фуд Огражден потенцираше дека посебно се задоволни што првата донација за поддршка на локални проекти во Струмичкиот регион е во земјоделскиот сектор.
“Ние силно веруваме дека рударскиот комплекс може да коегзистира со земјоделието и ќе го докажеме тоа наше уверување. Во наредниот период постои можност да помогнеме и ќе помагаме токму на земјоделското производство за да сите граѓани имаат подобар бенифит понатаму во животот. Ние сме секогаш отворени за соработка. Со оваа невладина и претходно сме соработувале, но спремни сме за да чуеме предлози и проекти и од други невладини организации кои работат на подобрување на животниот стандард на сите граѓани“, рече Гулев.
Ангелова Нада од Иловица изјави дека спремни се за работа, но неопходни им се и машини:
„Се занимавам со земјоделие, најмногу одгледувам компир и пиперки. Многу ми беше потребна оваа панирача и мислам дека ќе си ја користам до крајот на животот. Неопходна ни е за производството, наместо да позајмуваме, сега ќе постигнеме самите повеќе. Ние сме подготвени да работиме, само ни треба помош да бидеме поуспешни“.
Ленче Јорданова од Босилово објасни дека за неа најпотребни се материјалите за работа:
„Јас одгледувам цвеќиња и многу ми беа потребни материјали за таа цел. Тоа се најлони, ѓубрива, саксии, и сега почнувам да произведувам цвеќиња. Едноставно повикот на компанијата го видов како можност тоа да го обезбедам и преку здружението успеавме“.
Олеснување на земјоделските активности биле во фокусот на Виолета Георгиева од Еднокуќево кога се пријавувала за донација:
„Крајно сме благодарни на компанијата Еуромакс што ни додели корпа и фреза за обработка на земјата. Ние одгледуваме пиперка и зелка и оваа механизација ни беше неопходна за полесно да се обработи земјата“.
Слична желба имала и Гордана Златанова од Смолари:
„Ние добивме сеалка за сеење пченка. Се занимаваме со земјоделие и одгледуваме многу производи – пипер, бостан, тутун, а најмногу пченка. Ја садиме на поголема површина и сеалката ќе ни биде од голема полза, ќе ни ја олесни работата“.
За Вецка Јакова од Ново Село во земјоделската дејност нема предизвик со кој не може да се носи, под услови да ја има потребната механизација. Повикот за донации го разбира како пример дека бизнис секторот може да помогне на индивидуалните земјоделци:
„Јас добив култиватор и сум многу благодарна на Еуромакс за донацијата. Ми беше многу потребна, зашто од механизација тоа ми недостигаше. Јас возам трактор и после орање треба култиватор. Немав, ама сега и тоа го имам. Членка сум на здружението и потребни ни се вакви соработки со бизнис секторот за да се помогне земјоделството и сточарството“.
Целата донацијата се состои од систем за греење на стакларник за декоративни цвеќиња, култиватори за трактор, фреза од 1,2 метри, редосеалка за зрнести плодови, рачен мотокултиватор, култиватор за трактор, две тракторски фреза од 1,6 метри, рачна моторна фреза, тракторска корпа за носење на фрезата, лентирачка, танирачи и материјали за одгледување цвеќиња за жени фармерки од селата Ново Село, Смоларе, Иловица, Еднокуќево, Босилово и Радово во општините Босилово и Ново Село.
[КОМЕРЦИЈАЛНА ОБЈАВА]
