Полициски билтен: пронајдена марихуана кај две лица, возачот управувал пијан

На 12.11.2025 во 21:20 часот во Гевгелија, полициски службеници од СВР Струмица-ОВР Гевгелија го лишија од слобода В.Ш.(27) од Гевгелија. При контрола на патничко возило „даеву“ со гевгелиски регистарски ознаки, кое го управувал, кај него е пронајдена марихуана. Запознаен е јавен обвинител од Основното јавно обвинителство Гевгелија, а по документирање на случајот против В.Ш. ќе биде поднесен соодветен поднесок.

Ноќеска (13.11.2025) во 00:08 часот на ул.„Првомајска“ во Валандово, полициски службеници од СВР Струмица – ОВР Валандово ги лишија од слобода Т.П.(32) и  Р.А.(28), двајцата од с.Миравци, гевгелиско. При контрола во патниот сообраќај, полициските службеници сопреле патничко возило „опел корса“ со гевгелиски регистарски ознаки, кое го управувал Т.П., и по преземени мерки било констатирано дека е под дејство на алкохол, односно дека има 1,78 промили алкохол во крвта. Додека, при преглед во возилото, во кое сопатник бил Р.А., е пронајдена и одземена марихуана.

По целосно документирање на настанот, против Т.П. ќе биде поднесена пријава по член 297-а од Кривичниот законик – „безобѕирно управување со моторно возило“, а против двајцата ќе биде поднесена пријава по член 215 и член 216 од Кривичниот законик.

Фото: илустрација архива