Јанков на средба со струмичките бизнисмени: Потребен е отворен дијалог за посилен економски развој

Кандидатот за градоначалник на Општина Струмица од редовите на ВМРО-ДПМНЕ, Петар Јанков, денеска оствари средба со претставници на бизнис секторот од Струмица, на која присуствуваше и директорката на Управата за јавни приходи (УЈП), Елена Петрова.​

На средбата, како што информираше Јанков, се разговарало за актуелните предизвици со кои се соочуваат компаниите, можностите за унапредување на соработката помеѓу бизнис заедницата и институциите, како и за конкретни мерки за поттикнување на локалниот економски развој.​

Јанков пред присутните ги претставил своите визии и деловите од програмата кои се однесуваат на економската перспектива на Струмица како иден регионален центар.​

„Верувам дека ваквите отворени разговори се најдобар начин за да се најдат конкретни решенија кои ќе придонесат за подобра деловна клима и поголем раст на стопанството во нашиот регион“, изјави Јанков по средбата.

​Тој нагласи дека директниот дијалог со стопанствениците е клучен за креирање на политики што ќе одговорат на реалните потреби на економијата и ќе овозможат одржлив развој и просперитет за целата општина.