ПОЕТСКИ ТРИПТИХ СО МИТКО ГОГОВ, ЗОРАН АНЧЕВСКИ И НИКОЛА МАЏИРОВ
Здружението за развој на културата и заштита на културното наследство „Контекст-Струмица“ на 21 февруари 2024 година (среда) со почеток во 18:00 часот во просториите на Европската куќа (Europe House) во Струмица организира читање насловено „Поетски триптих“ на кој присутните ќе имаат можност да уживаат во поетските светови на Митко Гогов, проф. Зоран Анчевски и Никола Маџиров.
Преку поетско читање и разговор за поетиката која ја опфаќаат во нивните дела, овој поетски триптих има за цел да го доближи творештвото на овие автори поблиску до читателите.
Зоран Анчевски e поет, есеист и преведувач. Роден е во Скопје на 16 мај 1954 година. Завршил Филолошки факултет во Скопје. Доктор е по филолошки науки. Работи како професор на Катедрата за англиски јазик и книжевност на Филолошкиот факултет „Блаже Конески“ во Скопје. Претседател на Македонскиот ПЕН центар. Член е на ДПМ од 1994 година. Има објавено осум поетски збирки што се одлично примени од критиката, високо оценети и наградено со различни награди во земјата и во странство, како што се наградата „Студентски збор“ за најдобра дебитантска книга (1984), меѓународната награда „Џакомо Леопарди“ во Италија (2004), највисоката национална награда за поезија „Браќа Миладиновци“ на СВП за Небесна пантомима, како најдобра поетска книга во 2018 година и др.
Никола Маџиров е македонски поет, есеист и преведувач. Роден на 27 мај 1973 година во Струмица. Добитник е на наградите „Студентски збор“, „Ацо Караманов“, „Браќа Миладиновци“ и европската награда за млад поет „Хуберт Бурда“, која се доделува на автори родени во Централна и Источна Европа. Неговата поезија е преведена на повеќе јазици и објавувана е во неколку избори и антологии на македонската поезија. еговата поезија е објавена во над педесетина земји во светот, во Европа, Сад, Азија, Африка, Латинска Америка и во Австралија и преведена е на 41 светски јазик, меѓу кои и на: персиски, јапонски, хебрејски, шпански, галисиски, каталонски, келтски, хрватски, германски, бурмански, бугарски, хинди, малајалски, тамилски, украински јазик.
Mитко Гогов е роден 1983-та година во Скопје, Македонија. Пишува поезија, кратки раскази, есеистика и публицистика. Пишува и хаику, сенриу, ренга кои ги објавува повремено во микроблогосферата twitter. Неговото творештво досега е застапено и преведено во неколку антологии, стихозбирки и списанија за литература и уметност во Индија, Пакистан, Израел, Египет, Мексико, Аргентина, Кина, Тајван ,Филипините, USA, Русија, Велика Британија, Германија, Шпанија, Италија, Чешка, Романија, Грција, Србија, Хрватска, Албанија, Косово, Бугарија… Автор е на поетските книги „Ледена вода“ (ЕПФ, Србија, 2011) и во Македонија (2014), во едицијата „Огнови“ на издавачката куќа Антолог, „Скриено писмо“ (Антолог, 2019), „Линијар, Бројки“ (Макавеј, 2021) и „Бог на ба(к)терии“ (Макавеј, 2024 – во печат). Добитник е на наградите „Анџело Ла Векија“ (Сицилија, Италија, 2017), „Енхалон“ на Струшките вечери на поезијата (2018) и др. Организатор на меѓународната манифестација „100 Илјади поети за промена“ за Македонија.
