[ВИДЕО] Костадинов: Со голема почит кон Благој Истатов го организираме најголемиот турнир во мал фудбал во државата

Во знак на сеќавање на една од најголемите македонски спортски легенди, Благој Истатов, Општина Струмица и оваа година го организира Меморијалниот турнир во мал фудбал што го носи неговото име. Турнирот, кој важи за најголем и најмасовен во државата, претставува вистински спортски празник и начин да се оддаде почит на човекот кој остави неизбришлива трага во македонскиот фудбал.

Градоначалникот на Општина Струмица, Костадин Костадинов, во својот емотивен говор истакна дека споменот за великаните како Истатов мора да живее и да се пренесува на идните генерации.

„Благој беше пример – и останува инспирација. А ние имаме обврска да ја продолжиме традицијата, со чесен натпревар, со младински дух и со вистинска почит. Искрен и од срце говор денес, каков што заслужува габаритот на еден великан како Благој Истатов – човекот кој зад себе остави трага што не се брише“, изјави Костадинов.

Тој нагласи дека турнирот е повеќе од спортски настан – тој е поттик за здрави навики и чување на спомените за вистинските херои. „Струмица не заборава. Легендите живеат,“ порача градоначалникот.

Оваа година, турнирот може да се пофали со рекорден награден фонд од 1.000.000 денари, што го прави најпрестижниот настан од ваков вид во Македонија. Општина Струмица дава значајна поддршка за организацијата, обезбедувајќи 800.000 денари од вкупниот фонд.

Благој Истатов, легендарниот голман на Беласица, Партизан и македонската репрезентација, останува синоним за спортски дух, посветеност и љубов кон фудбалот. Преку овој меморијален турнир, неговото име и дело продолжуваат да бидат инспирација за младите спортисти и потсетник за богатата спортска историја на Струмица и Македонија.