Во Струмица одбележан големиот двоен празник-121 години Илинденско востание и 80 години од Првото заседание на АСНОМ

Денеска пред споменикот на Гоце Делчев, на истоимениот плоштад во нашиот град, во организација на Општина Струмица, беше одбележан големиот двоен празник Илинден: 121-годишнината од Илинденското востание и 80-годишнината од Првото заседание на АСНОМ.

За историографијата и значењето на двата Илиндена говор одржа членката на Советот на општина Струмица, Елена Магеровска Паликарова. Таа во својот пригоден говор меѓу другото истакна:

-Илинден 1903 и Илинден 1944 година-двата Илиндена, тоа се двете големи нешта кои го сочинуваат нашиот вековен светоглед. Тоа не прави исклучително горди, и таа гордост ја чуваме, негуваме и унапредуваме, пренесувајќи ја на помладите генерации како непроценливо наследство добиено од нашите предци, од нашите татковци, дедовци и прадедовци. Овој голем ден го славиме како Ден на Републиката. Колку тоа убаво и гордо звучи. Тоа е денот, кој со радост го носиме во нашите срца и души, голем ден кој живеел, живее и ќе живее во вековниот македонски споменар. Ден убав, ден значаен, ден на деновите – Илинден, рече Магеровска Паликарова.

Пред споменикот на Гоце Делчев свежо цвеќе положија претставници на Општина Струмица, како и претставници на институции и политички партии, а стихови за двата Илиндена кажуваа членови на рецитаторската секција при Домот за деца и млади „Благој Мучето“ од Струмица.