Костадинов: Пуштена во употреба првата делница од булеварот Струмица – Дабиле

Првата делница од новиот булевар што ги поврзува Струмица и населеното место Дабиле од денеска е официјално пуштена во сообраќај. Проектот, кој е заедничка инвестиција на Општина Струмица и Јавното претпријатие за државни патишта (ЈПДП), се очекува значително да го растовари сообраќајот на една од најфреквентните делници во државата и да придонесе за економски развој на регионот.

Градоначалникот на Општина Струмица во своето обраќање на социјалните мрежи ја истакна важноста на континуитетот во реализацијата на капиталните проекти, нагласувајќи дека овој пат е резултат на соработка низ повеќе раководства.

„Патот е започнат како проект на ЈПДП во време кога директор беше Зоран Китанов, договорот за партнерство го потпишав со тогашниот директор Ејуп Рустеми, а првата делница е финализирана со актуелниот директор Коце Трајановски. Им благодарам на сите за нивниот придонес, како и на мојот тим во општината кој вложи надчовечки напори за надминување на бројните имотно-правни проблеми“, изјави градоначалникот.

Тој додаде дека, и покрај нетрпението кај граѓаните поради пролонгирањето на изградбата, законските процедури морале да бидат испочитувани докрај.

Стратешката важност на проектот е огромна. Освен што ќе го олесни протокот на возила, новиот булевар ги поврзува околните струмички села и го трансформира статусот на Дабиле.

„Со оваа реализација, Дабиле практично добива третман на струмичка населба со булеварско поврзување до центарот на градот. Во непосредна близина се наоѓаат и две локални индустриски зони, а се овозможува и директно поврзување со Република Бугарија. Ова е благодет што носи повисока вредност на имотите и го подобрува секојдневието на граѓаните“, истакна градоначалникот.

На крајот, тој упати повик за единство, нагласувајќи дека патот е изграден со финансии од граѓаните и за граѓаните и како таков треба да служи за доброто на сите. Работата на останатите делници од булеварот ќе продолжи во следниот период.