Елеуса Фондација ја започна кампањата „Подари дел од својата трпеза, нахрани гладен“

Елеуса Фондација  започна голема хуманитарна акција под мотото „Подари дел од својата трпеза, нахрани гладен“. Во поголемиот број маркети низ Струмица поставени се корпи во кои граѓаните може да оставаат прехранбени продукти, кои потоа ќе бидат доставени до најсиромашните наши сограѓани за претстојните божиќни празници.

Корпите со препознатливото лого на Елеуса Фондација и мотото „Подари дел од својата трпеза – нахрани гладен“ поставени се низ маркетите на Стокомак, Супер Кит го, Супер Тинекс, Маркети Црвена Ружа,  Лаки 2000, Маркет Дарко Вељуса и Хоризонт во Турново.

– Огромна благодарност упатуваме кон нашите партнери чиј број се зголемува од година во година. Општествено одговорните компании од нашата заедница не ги забораваат луѓето кои страдаат. Така и овојпат маркетите со големо срце, отстапија простор за корпите во кои граѓаните може да ги оставаат донациите во храна, појаснуваат од Фондацијата додавајќи дека целта е оваа хуманитарна акција да нѐ направи сострадални.

– За жал, бројот на гладни наши браќа и сестри секојдневно расте. Оваа кампања е со цел да ни ги отвори срцата да сострадуваме и да покажеме дека во нас сè уште има љубов и дека не сме го изгубиле човечкото, дека не можеме да бидеме спокојни што некој заспива гладен, дека не ни е сеедно што има дечиња кои поминуваат со еден оброк или без ниеден, велат од Елеуса Фондација.

Собраната храна ќе биде употребена во подготовка на Божиќните пакети кои ќе ги добијат околу 160 фамилии во Струмица и населените места кои гравитираат кон Струмичката православна епархија.

Акцијата „Подари дел од својата трпеза, нахрани гладен“ ќе трае до крајот на месецот.

Секој што сака да придонесе во остварување на хуманите цели може да се обрати на електронска пошта eleusafondacija@gmail.com или на телефонскиот број 078 218 660.

Отворени се и сметките:

Денарска жиро-сметка: 300030000262856

Фондација ЕЛЕУСА Струмица

Цел на дознака: Донација

Девизна сметка:

KOMERCIJALNA BANKA AD SKOPJE

BRANCH STRUMICA MACEDONIA

SWIFT: KOBS MK 2X SRB

Beneficiary Customer:

IBAN: MK07300701003869006

FONDACIJA ELEUSA STRUMICA

Kiril i Metodij 24 STRUMICA, R. MACEDONIA