Нова финансиска поддршка за жени претприемачки во Струмица: По 6.000 денари за 10 старт-ап бизниси

Десет новоосновани фирми предводени од жени во Општина Струмица ќе добијат неповратна финансиска поддршка во износ од 6.000 денари, наменета за плаќање на комуналната такса при регистрација на фирма. Средствата се обезбедени преку Програмата за еднакви можности на Општина Струмица, а проектот го спроведува Здружението „Совет за промоција и развој на женско претприемништво“.

Јавниот повик, објавен на 10 јуни 2025 година, има за цел да ги охрабри и економски да ги зајакне жените, особено младите и оние од руралните средини, кои одлучиле да започнат сопствен бизнис. Со покривањето на овој административен трошок, иницијативата директно придонесува за олеснување на првичните чекори во претприемништвото.

За да се квалификуваат за поддршката, апликантките треба да исполнат неколку услови: да се жителки на Општина Струмица, а нивната новооснована фирма да биде регистрирана на територијата на истата општина.

Процесот на доделување на средствата ќе се одвива по принципот „прв дојден, прв услужен“, што значи дека првите десет претприемачки кои ќе аплицираат со комплетна документација ќе ја добијат поддршката. Клучен документ за исплата е Решението за комунална такса издадено од градоначалникот на Општина Струмица, а средствата ќе бидат префрлени на сметката на фирмата. Повикот останува отворен до исполнување на квотата од десет фирми.

Заинтересираните претприемачки можат да аплицираат и да најдат повеќе информации на официјалниот линк на Здружението: https://zenapretpriemachstr.mk/javen-povik/.