Градоначалникот Јанков присуствуваше на модната ревија „Убави сме, свои сме“ во организација на „Вера“
-Сите сме еднакви, сите заслужуваме шанса, видливост и поддршка, и убавината е во различноста, во храброста и во љубовта со која чекориме низ животот.
Оваа порака ја упати градоначалникот на општина Струмица, Петар Јанков, од модната ревија „Убави сме, свои сме“ којашто синоќа по деветти пат се одржа во организација на Здружението „Вера“ и поддршка на Општина Струмица.
Градоначалникот Јанков со посебна почит и поддршка учествуваше на оваа модна ревија и прошета по модната писта со две прекрасни девојчиња, упатувајќи силни пораки за поддршка и за организаторите и за учесниците.
-„Убави сме, свои сме“ не е само модна ревија. Ова е движење и глас за човечноста, достоинството и прифаќањето. Оваа манифестација им дава можност на нашите деца да блеснат на сцена, да бидат видени, почитувани и поддржани. И секое нивно појавување овде, секоја насмевка и прошетка по пистата верувајте дека е една голема победа за сите нас. Победа над предрасудите и тишината кои време е да ги надминеме. Како градоначалник, сакам да порачам дека Општина Струмица ќе продолжи да создава услови во кои секое дете, секој млад човек, секое лице ќе се чувствува рамноправно, вредно и почитувано. Тоа е нашата обврска и пред се, наша заедничка мисија. За крај сакам да ви порачам едно, да ја негуваме емпатијата, да го славиме различното и да создадеме општество каде секој човек има свое место. Тоа да не ни биде чин на гест туку начин на живот, рече во своето обраќање градоначалникот Петар Јанков.
Фото: Општина Струмица
