Џон Њуман и Бурак Јетер со Констракта пристигнуваат на „ЕГЗИТ“ спектаклот во Струмица, влезот слободен!

На второто издание на „Get EXITed“ настанот во Градскиот парк во Струмица на 7 септември пристигнуваат возбудливи светски и регионални имиња. На овој Егзитов спектакл, кој минатата година го посетија повеќе од 20.000 луѓе, ќе настапи мега-ѕвездата – единствениот продуцент, пејач, текстописец и диџеј Џон Њуман, кој со години суверено ја носи титулата поп и соул ѕвезда. Во Струмица пристигнува и творецот на најголемите светски хитови Бурак Јетер, кој на овогодишниот „ЕГЗИТ“ фестивал со спектакуларен настап до утро ги држеше десетиците илјади разиграни фанови пред главната бина Горки Лист. Тие ѝ се придружуваат на неповторливата Констракта, а дополнително ќе бидат објавени и останатите музички ѕвезди коишто ќе настапат на овој музички спектакл.

„Од првиот „Егзит“, гостите од Северна Македонија беа меѓу најбројните и особено задоволство ни е, уште еднаш да ја донесеме моќната енергија на ЕГЗИТ фестивалот во Струмица. Минатогодишното издание навистина ги надмина сите очекувања, за време на настанот немаше слободно сместување во околината на Струмица, туристите дојдоа од целиот регион, а на 7 септември со најголемите глобални и регионални имиња продолжуваме во уште посилен ритам“, најавува основачот и директор на ЕГЗИТ Фестивал Душан Ковачевиќ.

За градоначалникот Костадин Костадинов голема е честа и задоволството што во Струмица, по втор пат се одржува “Get EXITed“- музички спектакл.

„Струмица и годинава преку звукот и светлината на „Get EXITed“ ќе биде музички центар на Балканот. Минатата година покажавме дека сакаме, можеме и успеавме, Големиот градски парк да го направиме место на кое повеќе од 20.000 луѓе уживаа во Егзитовиот спектакл, прв и единствен во државата. Докажавме дека нашата Струмица заслужено се најде на мапата на светски познатиот фестивал „Егзит“. Со нетрпение го очекуваме второт издание на „Get EXITed“ на којшто меѓу другите ќе настапат елитните светски имиња Џон Њуман, Бурак Јетер и Констракта.  Испишуваме нова страница на Струмица, стануваме препознатлива музичка дестинација на Балканот преку која го афирмираме целокупното наше општинско богатство, културно – историското наследство, европските вредности и туристичкиот потенцијал. Му благодарам на организаторот на „Егзит“ од Нови Сад за укажаната чест и сигурен сум дека и на 7.Септември ќе ја оправдаме довербата и ќе покажеме дека Струмица е една и единствена за големи спектакуларни фестивали“, рече Костадинов.

Струмичкиот „Get EXITed“ го организира „ЕГЗИТ“ тимот во соработка со Општина Струмица, влезот на овој голем настан е слободен, додека за заинтересираните посетители кои имаат желба за ВИП секција, на овој линк има повеќе информации и детали.