„ФАЈНЕНШЕЛ ТАЈМС“ ОЦЕНИ ДЕКА НЕДОСТИГОТ НА БАКАР ЌЕ СЕ ПОЧУВСТВУВА ВО СВЕТОТ ОД 2028 ГОДИНА Македонија го има металот во Иловица, но не го искористува
Bended fat curved copper cables. Electrical conductor.
Се предвидува дека понудата на бакарот ќе биде помала од побарувачката за 8 отсто во 2035 година, а за 44 отсто во 2050 година.
„Следниот голем ресурсен шок“ – вака гласи оценката од анализата на „Фајненшел тајмс“ посветена на недостигот од бакар за најголемите индустрии во претстојниот период. Во неа пишува дека одличната спроводливост на овој метал го прави бакарот централен елемент во речиси секој дел од приказната за нискојаглеродната енергија, од соларните панели до електричните автомобили. Тој е од витално значење и за центрите за податоци со вештачка интелигенција и за сè посложените производи од воената индустријата, па владите се тркаат да го набават бакарот во што поголеми количини, во услови на нестабилен геополитички пејзаж.
„Што имаат заедничко зелената транзиција, експлозијата на вештачката интелигенција, брзата инвестиција во војската и бумот во инфраструктурата во земјите во развој со висок раст? Сите тие се меѓу најважните мегатрендови во светската економија. И сите се загрозени од претстоен проблем: глобален недостиг на бакар. Побарувачката за бакар е од епски размери, а изгледите за понудата не се ни блиску до задоволување на потребите“, пишува во анализата.
Како што се додава, во извештај објавен неодамна, истражувачите од „БлумбергНЕФ“ (BloombergNEF) ги изнеле размерите на проблемот со бакарот, предупредувајќи на „огромен долгорочен недостиг“ што ќе започне во 2028 година. Се предвидува дека понудата ќе биде помала од побарувачката за 8 отсто во 2035 година, а за 44 отсто во 2050 година. Ова истражување доаѓа по слични предупредувања за големи претстојни дефицити во понудата, кои доаѓаат и од други извори, вклучително и од Меѓународната агенција за енергетика.
– Изградбата на еден дата центар може да трае шест месеци, но за откривање на ново наоѓалиште на бакар, добивање дозволи и изградба на нов рудник може да бидат потребни 15 години. Всушност, многу компании што експлоатираат бакар се мачат дури и да го одржат производството на постојните локации – голем дел од нив работат со децении и се соочуваат со опаѓање на квалитетот на рудата. Во однос на обемот на побарувачката, бројот на нови „гринфилд“ рудници што се пуштаат во производство е исклучително мал, бидејќи во текот на изминатите неколку децении значително се намалени активностите за нивно откривање и развој – оценува Џонатан Прајс, извршен директор на големиот производител на бакар „Тек“.
Дали Македонија ќе ги искористи своите потенцијали на бакар во период кога светот ќе се бори за повеќе количини од металот? Во моментов функционира единствено рудникот за бакар „Бучим-Боров дол“, кој веќе ги исцрпува капацитетите. Од друга страна, во минатото голем број инвестиции во проекти за ископ на бакар пропаднаа и сега актуелна е само гринфилд инвестицијата во проектот „Иловица-Штука“. Во Стратегијата за минерални суровини 2026-2046, беше посочено Македонија да ги искористи капацитетите на критични суровини и да се вклучи во светската трка, запазувајќи ги европските стандарди во рударството.
Усогласувањето со европските стандарди се очекува и преку усвојувањето на најавените предлог закони за рударство и за геологија. Текстовите на двата закона неодамна беа расправани и во Стопанската комора на Македонија, од каде соопштија дека предложените решенија се насочени кон обезбедување поголема правна сигурност, поттикнување на инвестициите, поефикасни административни постапки и зајакнување на заштитата на животната средина.
„Рударството и геологијата не се само економски дејности. Тие претставуваат важен дел од индустриската основа на државата, обезбедуваат суровини за бројни други сектори, отвораат работни места, придонесуваат за локалниот и за регионалниот развој и имаат значајна улога во економската и стратешката сигурност на земјата. За овој сектор да се развива одржливо и конкурентно, неопходна е стабилна, јасна и предвидлива законска рамка. Потребни се правила што ќе овозможат одговорно управување со минералните суровини, квалитетни геолошки истражувања, безбедно работење и заштита на животната средина, а истовремено ќе создадат услови за нови инвестиции и модернизација на постојните рудници“, соопштија од Комората.
Додека трае светската трка за минерали, а кај нас се расправа за предложените текстови на законите кои се очекува да отворат пат за нови инвестиции и геолошки истражувања, од локалната иницијатива „И здравје и работа“, која дава поддршка за проектот во Иловица, соопштија дека Македонија не смее да ја пропушти шансата за економски развој преку одговорно искористување на минералните ресурси.
„Македонија не смее да остане само набљудувач на овие процеси. Земјата располага со минерални ресурси и проекти што отвораат прашања за нивната економска оправданост, иднина и можен придонес кон развојот. Иловица е еден од најзначајните примери во оваа дебата, но и пример како значајни рударски инвестиции можат со години да останат без конечна разврска. Развојот на рударството не смее да биде тема што се сведува на дневнополитички преписки, меѓусебни обвинувања и политички пораки. Тоа е сложено економско, техничко и општествено прашање што бара стручна, аргументирана и инклузивна дебата“, се наведува во соопштението.
Од иницијативата додаваат дека Македонија не смее да ја пропушти можноста минералните ресурси да ги разгледува како дел од својата долгорочна развојна политика, а одговорното рударство, кога е економски оправдано и усогласено со високите стандарди за заштита на животната средина, може да создаде можности за инвестиции, работни места, развој на локалните бизниси и подобрување на животниот стандард.
(Преземено од www.plusinfo.mk, линк од објавата: https://plusinfo.mk/fajnenshel-tajms-oceni-deka-nedostigot-na-bakar-e-se-pochuvstvuva-vo-svetot-od-2028-godina-makedonija-go-ima-metalot-vo-ilovica-no-ne-go-iskoristuva/)
