Градоначалникот на Тирана,Велиај, со највисоки почести го пречека Костадинов

Во рамките на посетата на регионалната конференција на тема „Безбедни. Зелени. Решенија за паметни градови: Ризик и можности за Западен Балкан“, градоначалникот на Струмица Костадин Костадинов оствари формална средба со градоначалникот на Тирана, Ерион Велиај, каде како гостин на град Тирана беше пречекан со највисоки почести.

Во рамките на едночасовниот разговор, двајцата градоначалници меѓусебно се запознаа со реализацијата на програмите и плановите за управување со Општините и разменија искуства од тековната работа. Во таа смисла, градоначалникот Костадинов од тиранскиот градоначалник доби недвосмислена и безрезервна поддршка во работата и напорите кои ги вложува за град Струмица со конкретна иницијатива за споделување на добрите практики кои во изминатите години се реализираат во Тирана и даваат суштински резултати за граѓаните.

Официјалната средба продолжи во поширок формат со присуство на Арбјан Мазнику, заменик градоначалник на Тирана и Ѓоко Ристовски, раководител на Одделението за меѓународна соработка и европски фондови во  општина Струмица, каде на тркалезна маса се дискутираше за конкретните планови на двете Општини поврзани со актуелни теми за третман на енергијата и модели за изнаоѓање соодветни решенија.