Општина Струмица организира „Саем на книга 2026“ на плоштадот „Гоце Делчев“

Општина Струмица од 26 до 28 мај ќе биде домаќин на културната манифестација „Саем на книга – Струмица 2026“, настан кој ќе се одржи на градскиот плоштад „Гоце Делчев“.

​Свеченото отворање на саемот е закажано за вторник (26 мај) со почеток во 12 часот. Како што информираат од локалната самоуправа, настанот е посветен на сите љубители на книгата, пишаниот збор и новите идеи.​

Во текот на трите саемски денови, посетителите ќе имаат можност да се запознаат со понудата на поголем број издавачки куќи. Програмата предвидува претставување на нови изданија, книжевни промоции, како и разновидни културни содржини наменети за сите генерации.​

Годинешното издание на саемот се одржува под мотото „Книгата нè поврзува, идеите нè инспирираат“, а од Општина Струмица упатија отворена покана до сите граѓани за заедничко прославување на културата, знаењето и љубовта кон читањето.