Алиу: Нов компјутерски томограф, намален долг и реконструиран оддел за струмичката болница

раѓаните од струмичкиот регион од следната недела ќе добијат значително подобрен пристап до дијагностички здравствени услуги. Во струмичката болница ќе биде инсталиран нов компјутерски томограф кој ќе функционира согласно сите пропишани медицински стандарди. Информацијата ја потврди министерот за здравство Азир Алиу, кој одговарајќи на пратенички прашања во Собранието, се осврна на актуелната состојба и процесот на стабилизација на оваа здравствена установа.

Според министерот, паралелно со набавката на новата опрема, интензивно се работи и на финансиско и инфраструктурно закрепнување на болницата во Струмица. Тој информираше дека во поглед на финансиската стабилизација, установата била затекната со огромни долгови кои надминувале 100 милиони денари. Сепак, преку реорганизација на работењето и подобро управување, долгот веќе е намален за околу 20 милиони денари, а процесот на стабилизирање на буџетот продолжува и понатаму.

Што се однесува до инфраструктурните зафати, во болницата веќе е целосно реконструиран еден оддел. Овој дел од установата моментално е во фаза на технички прием и се очекува многу наскоро да биде ставен во целосна функција за прием на пациенти. Алиу нагласи дека струмичката болница е клучен дел од стратегијата за зајакнување на регионалните здравствени капацитети, чија главна цел е искористување на расположливите човечки и технички ресурси за граѓаните да добиваат поквалитетни и подостапни услуги поблиску до своето место на живеење.

Во рамки на поширокиот план за унапредување на здравството во земјата, министерот најави и нов инвестициски циклус од над 205 милиони евра наменет за другите градови низ државата, како и процес на целосна дигитална трансформација на здравствениот систем кој ќе ги заштити податоците и ќе ги унапреди услугите.