„Астерфест“ од 4 до 8 август во Амфитеатарот во Струмица

Од 4 до 8 август, во Амфитеатарот во Струмица, ќе се одржи 18-тото издание на Интернационалниот филмски фестивал „Астерфест“, во знакот на новите тенденции во кусометражниот, документарниот и авторскиот филм.

Во овогодишната програмска селекција има дваесет и три исклучителни кратки играни филмови, документарци и анимации кои ќе се натпреваруваат за „Златната“, „Сребрената“ и „Бронзената потковица“ и за неколкуте други награди. Главната програма е составена од: полскиот „3 генарации“ на Паулина Зиулковска, канадскиот „Гавранко“ на Шон Меккерон, британските  филмови „Дебитантката“  на Елизабет Хобс и „Уште жив“ на Лијам Сент-Пјер, американските „Еж“ на Д. Митри, „За скептиците“ на Дон Вестлејк, бугарскиот „Задача“ на Дејан Ангелов, иранскиот „Помош“ на Мехди Хосеинзадех, црногорскиот „Проценти живот“ на Владимир Перовиќ, францускиот „Таткото, синот и рав Калменсон“ на Дајан Д. Валид, португалскиот „Трговци со мраз“ на Жоао Гонзалез, германските „Шекспир за сите“ на Ханес Рал и „Живот во меур“ на Натали Мекмахон и Никола Дрвошанов, како и словенечкиот „Легендата за Златорог“ на Леа Вучко.

Од македонските филмови ќе бидат прикажани „Тале и Корона“ на Томислав Алексов, „Сценариото“ на Александра Кардалевска, „Звукот на тишината“ на Анастасија Лазарова Пилинг, како и дипломските филмови „Кажи ми дека сме за стварно“ на Максим Илковски и „Новиот почеток“ на Тања Симоновска.

Во програмата ги имаме и краткиот британски филм што оваа година доби Оскар, „Ирско збогум“ на Том Беркли и Рос Вајт, како и данскиот номиниран за Оскар „Ивалу“ на Андерс Валтер.

Фестивалот за првпат ќе има три светски премиери. Првата е австралиската фикција „Штипење“ на Eми Патмор и Ана Дворжак, филм за ученичка во последна година од средното училиште која се бори со тивката болест што ја крие од мајка си, и понатаму несетено совладувана од притисокот на семејството, нејзините врсници и општеството.

Втората фестивалска премиера ќе биде македонскиот „Лука“, во режијa и монтажа на Ице Виранов, по сценарио на Џејд Бинева, краток документарец што го прикажува животот на група млади музичари од Струмица, кои во кризни времиња за опстојување на алтернативната културна сцена се борат да најдат начини за изразување на својата музичка креативност и иновативност. Кинематографер е Столе Ангелов, камерата е на Иво Јанков, музиката на Ставро Ангелаков и Љубен Маџиров, а продуценти се Никола Пијанманов и Васил Михаил.

Специјална премиера ќе има и „Сонцето не грее на сите страни“, по сценарио и во режија на на Глигор Кондовски, филм што ја следи приказната за македонскиот Елвис Присли – Ване Црнгаров, роден во струмичкото село Куклиш, кој заминува да живее во Австралија. Камерата и монтажата се на Слаѓан и Давид Милошевски, Беби Зекировски и Иван Костадиновски.

Легендарната Каталин Ладик е овогодишен добитник на наградата „Астер“ за животно дело. Ладик (родена во 1942 г.) е филмска и театарска актерка, писателка, една од најистакнатите, најплодните и најнаградувани претставнички на алтернативната изведувачка уметност во поранешна Југославија и во Унгарија и една од највлијателните европски уметнички во последните децении. Кариерата ја започнала во 1963 г., кога дебитира на радиото и во театарот. Истата година ја проширува својата актерскa активност и на филмот и на телевизијата. Досега има одиграно многу значајни улоги во филмови од современи режисери, како Лордан Зафрановиќ, Карољ Вичек, Миклош Јанчо, Зоран Маширевиќ, Андраш Рајнаи и други. Во 1992 година се преселила во Унгарија, а во следните 20 години живеела и работела наизменично во Нови Сад, Будимпешта и на островот Хвар. Паралелно со своите улоги и книги, таа се занимава и со звучна и визуелна поезија, експериментална музика и перформанси.

Како дневни настани на „Астерфест“ се планирани Астер-портретот на Каталин Ладик, промоција на поновата филмска литература (Луис Буњуел, Дина Јорданова, Атанас Чупоски), во соработка со Кинотеката, како и други неформални активности.

На „Астерфест“ ќе има и проекција на реставрираната верзија на долгометражниот игран филм „Планината на гневот“, во знак на 5-годишнината од смртта на Љубиша Георгиевски и 55 години од продукцијата на филмот, со Ристо Шишков во главната улога.

Завршната вечер е предвидена за проекцијата на унгарскиот шеесетминутен „Звучен кафез“ на Корнел Силаги (Игор Бухаров), во чест на лауреатката Ладик, во повремена придружба на Георги Трајков со акустична гитара.

Официјалното стручно жири го сочинуваат: Гоце Ристовски, Дрита М. Фазлија и Мили Чумиќ.

Осумнаесеттиот „Астерфест“ се одвива под мотото „Со нови искуства“, а фестивалот е финансиски поддржан од Општина Струмица и од Агенцијата за филм на РС Македонија.