Во Југоистокот лани ажурен бил само судот во Гевгелија, Струмица и Радовиш не биле ажурни

Од основните судови во Југоистокот лани ажурен бил само Судот во Гевгелија, додека судовите во Струмица и Радовиш не се ажурни.

Ова беше соопштено на денешната седница на Судскиот совет на кој се разгледуваше извештајот за работата на судовите за 2024 година.

Беше истакнато дека во Основниот суд во Радовиш се зголемил остатакот за 153 предмети, но треба да се има предвид фактот дека таму работат двајца судии.

-Основниот суд во Струмица го зголемил заостатокот за 1.043 предмети, но имаат голем број на предмети кои ги примиле за работа-19.611 предмети, така што на овие апелациски подрачја може да се заклучи дека судиите дале голем напор да сработат, но во некои судови невозможно е бидејќи недостасуваат судии, истакна Антоанета Димовска, која беше известител на седницата.

Инаку, скоро половина од судовите од државата лани биле неажурни, односно од 34 судови ажурни биле 18, а неажурни се 16 од кои три се апелациски, 12 основни и Вишиот управен суд.