Филипче и Костадинов: 118 семејства ќе добијат дом – вистински пример на хуманост и грижа во Струмица

Претседателот на Социјалдемократскиот сојуз на Македонија, Венко Филипче, денеска заедно со градоначалникот на Oпштина Струмица, Костадин Костадинов,  претседателот на Советот, Марјан Даскаловски, членови на Советот и општинската администрација, ја посетија локацијата во Струмица каде што е изградбата на социјалната населба и за која започнува втората фаза на реализација.

Станува збор за еден од поголемите капитални проекти во оваа општина, во рамки на кој ќе се изградат вкупно 118 куќи со кои трајно ќе се реши проблемот за домување на социјално ранливите граѓани од турското маало во Струмица.

-Ова ќе биде една цела нова населба, еден мини град, каде градежните работи се почнати од нула. На локацијата немаше ништо, а сега веќе има канализација, има струја, има улица и во следната односно последна фаза ќе почне изградбата на објектите. Ова ќе биде наслба во којашто ќе се сместат луѓе од ранливи категории кои сега живеат во супстандардни и небезбедни услови. Во овие 118 станбени единици со соодветни стандарди, квалитетот на животот на тие граѓани  значајно ќе се подобри и дополнително ќе се решат инфраструктурните проблеми во близина на оваа населба, како што е водоснабдувањето“, рече Филипче. 

При тоа Филипче посочи дека овој и сите други проекти на локалната самоуправа на Струмица ги отсликуваат социјалдемократските вредности за еднаквост и грижа за сите граѓани. 
-Ова е само еден во низата на крупни проекти на општина Струмица. Ќе ги споменам новиот пазар, автобуската станица, електричниот јавен превоз со кој Струмица е прв град на Балканот со ваков превоз, изјави Филипче, додавајќи дека општина Струмица е пример како со дела се развиваат и имплементираат проекти кои суштински менуваат работи и го подобруваат животот на граѓаните.

Градоначалникот Костадинов истакна дека социјалната населба е вториот најголем проект во историјата на Струмица по јавниот електричен превоз, со цел дислокација на дивонаселената населба на „Климент Охридски“ за која знае јавноста дека таму жителите живеат во дивоградби на небезбедна локација.

-Ова е неколку децениски проблем којшто ги тишти и жителите во долното Турско маало и цела Струмица генерално оти сите сочувствуваме и како Општина првата фаза ја реализиравме со износ од 100 милиони денари и е целосно завршена, ставени се потпорни ѕидови, изградена е улицата, поставено е улично осветлување и канализација, во втората фаза е поставена водоводна линија, има нов резервоар којшто не ги решава само проблемите на оваа нова Турска социјална населба туку го решава и проблемот со водоснабдување во горниот дел од градот. Веќе сме подготвени за започнување на првиот дел од третата фаза, а тоа значи дека од страна на Секторот за урбанизам изготвени се проекти за куќите чиј вкупен број е 118, но сега се изготвени проекти за 26 куќи коишто согласно вториот повик распишан од страна на Владата ние веќе го имаме аплицирано и се надеваме дека овој пат Владата ќе се издигне над дневнопартиските нивни интереси и конечно ќе даде поддршка за она што значи крупни капитални проекти за граѓаните на општина Струмица, изјави градоначалникот Костадинов.