Волонтери од Црвен крст Струмица одржаа показна вежба за пружање прва помош

Волонтерите од Тимот за укажување прва помош при Општинската организација на Црвен крст Струмица денеска пред Бибиотеката „Благој Мучето“ оганизираа показна вежба на која ги презентираа своите знаења и вештини за давање прва помош во случај на повреди.

Волонтерите и денеска несебично се трудеа да ги покажат своето знаење и вештини и уште еднаш потврдија дека се подготвени да пружат помош во случај на повреди.

Танкица Стојанова информираше дека секоја година по повод Светскиот ден на првата помош се организира вежба за укажување прва помош.

-Тоа се прави кај повреди  за кои граѓаните можат да реагираат и да укажат прва помош. Годинава фокусот е на средношколците и затоа сите наши волонтери кои укажуваат прва помош се средношколци. Целта е, всушност, да се подигне свеста кај средношколците дека  и на која возраст да се тие треба да се фокусираат на првата помош, бидејќи не знаеме кога и каде ќе ни се случи за да знаеме да укажеме прва помош.Најчести повреди на кои може да се укаже прва помош се раните и скршениците, паѓањето во безсознание, топлотните удари, како и клиничката смрт и токму со нашата вежба ние ги прикажуваме најчестите повреди кои може да се случат во секојдневието, рече Стојанова во изјавата за медиумите кои ја следеа вежбата.

Волонтерот Димитар Спасов во својата изјава за медумите истакна дека младите, односно средношколците се обучени за пружање прва помош.

-Секое училиште има тим за прва помош, кој знае да даде прва помош доколку тоа е потребно и преку подготвките за натпревари на локално ниво и нашето учество на нив, сме подготвени. Исто така, преку Црвен крст ги обучуваме средношколците да даваат прва помош, со тоа што често организираме симулациски вежби низ средните училишта во општината, рече Спасов.

Показната вежба се одржа во рамки на Светскиот ден на првата помош, кој се одбележува со повеќе активности во текот на септември.