Нé чека економски тешка, но година со добри берзански можности

Капитал Ассет Менаџмент ја одржа традиционалната Годишна инвеститорска средба во 2023, година за која изгледите се дека ќе биде полесна за инвестирање од претходната. Очекувањата се дека инфлацијата ќе продолжи да забавува, како што потврдуваат и последните официјални статистички податоци, што значи полесни денови за инвеститорите. Заедно со намалениот економски раст или потенцијалната рецесија, ќе се креира средина во која централните банки тешко ќе наоѓаат аргументи да бидат поагресивни во подигнување на каматните стапки. А, во втората половина на годината, може да се очекуваат и мерки на разлабавување на монетарните политики.

Најсилните ризик фактори повторно доаѓаат од геополитичките превирања и  неконтролираното излегување од контрола на цените на базните материјали.

На средбата што се одржа во Стопанската комора на Македонија пред инвеститорите се обрати Коста Костадиновски, директор на Капитал Ассет Менаџмент. После 2022 година, која Друштвото ја искористи за стабилизација и развој, според Костадиновски во фокусот се позитивните берзански движења на цените на почетокот на годинава.  

„Инвестирањето е лесно, но трпението е потешкиот дел од процесот. Опаѓачките пазари креираат неверојатни можности, особено за  инвеститори кои можат да докажат дека намалувањето на берзанската цена нема ништо заедничко со силата и капацитетот на компанијата да продуцира приходи, профити и дивиденди. Нашиот фокус тековнава година е да купиме што е можно поголеми количини акции од квалитетни компании на ниски цени. На пазарот се уште постојат компании кои имаат неверојатно ниски цени. “, рече Костадиновски.

Капитал Ассет Менаџмент е единствено друштво за инвестиционо советување на пазарот, кое ја нуди услугата индивидуално управување на портфолио на хартии од вредност. Минатата година, иако влијанијата од надворешното окружување беа исклучително негативни,  имотот под управување со индивидуално портфолио за клиенти порасна за 65%.