Струмица домаќин на караванот на Министерството за образование и наука на националната кампања „Магијата е во знаењето“

Струмица денеска беше домаќин на караванот на Министерството за образование и наука кој ја спроведува националната кампања „Магијата е во знаењето“. Во домот на АРМ се одржа петтиот панел на тема „Магијата на создавање храбри, мислечки и сочувствителни личности“, а учествуваа министерката за образование и наука проф. Д-р Весна Јаневска, градоначалникот на општина Струмица Петар Јанков, претставници на државни и општински институции и просветни работници.

Градоначалникот Петар Јанков ја поддржува кампањата и работата на просветните работници, бидејќи како што вели, тие се луѓето коишто стојат позади нашите ученици.

-Често велиме дека иднината е во младите, но младите, нивните визии и работа треба да ја градат просветните работници. Тие стојат позади нив и ги насочуваат во кој правец треба да се движат, и они и општеството. Општина Струмица секогаш ги поддржува ваквите иницијативи и кампањи. Нека оваа кампања не биде само настан, туку поттик и поддршка на просветните работници и да имаат јасна визија дека Општината секогаш стои позади нив, изјави градоначалникот Јанков.

За министерката Јаневска, целта на кампањата е да се подигне свеста на целото општество за значењето на наставникот во општеството.

-Кампањава ја спроведуваме за наставниците, но сакаме да допреме и до родителите и до учениците и до градоначалниците и до целото општество за да сите заедно ги поддржиме како најсилна алка во образовниот процес. Образовниот систем има многу компоненти, но најсилната, највредната алка која придонесува се наставниците. Оттука Министерството постојано ќе стои зад нив, ќе ги слуша нивните барања, нивните приговори, дури ако има и нивни добро коментари за она што го работиме за да можеме со помош на базата да креираме добри политики во иднина. Порака до наставниците: Министерството и Општината се секогаш отворени за нив. Ние им стоиме на располагање, а со оваа кампања се обидуваме да придонесеме сите заедно за подобра иднина на нашата земја, изјави министерката Јаневска.

Во првиот дел од панел-дискусијата учествуваа министерката за образование и наука проф. д-р Весна Јаневска, Ана Витанова – Рингачева, вонреден професор на катедрата за македонски јазик и литература на Филолошки факултет при Универзитет „Гоце Делчев“ од Штип и Стојне Митева, психолог и гешталт терапевт при ООУ „Маршал Тито“ од Муртино.

Во вториот дел на панелот свои искуства и мислења споделија Трајче Бјадов, наставник по македонски јазик при ООУ „Герас Цунев“ – Просениково, Струмица, Архелос Туранов, директор при ДСУ РЦСОО „Никола Карев“ од Струмица и Мери Доневска Костуранова, родител и претседател на Совет на родители при струмичкото СОУ „Јане Сандански“.

Фото: Општина Струмица