Известување од општина Струмица во врска со објавата на компанијата „Ривер софт“

По објавата на сопственикот на компанијата Риверсофт,Тони Костов, дека се добитници на јавната набавка за новогодишно украсување на Струмица и дека како општествено одговорна компанија се откажуваат од 500 илјади денари и побара истите да се насочат во хумани цели, Општина Струмица испрати известување до јавноста. Известувањето го пренесуваме во целост:

-На иницијатива на градоначалникот на Општина Струмица, Советот на Општина  Струмица донесе Одлука со која оваа година, од предвидените 2,5 милиони денари за новогодишно украсување, да се издвојат 593.220,00 денари  без  ДДВ, а останатите да се донираат и потрошат за борба со вирусот  Ковид – 19.

По донесување на оваа Одлука, на ден  02.12.2020 година беше објавен  Огласот за јавна набавка бр.18094/2020, на кој учествуваа двајца економски оператори. По извршената електронска аукција, донесена е Одлука за најповолен понудувач, која  се уште не е конечна. Во моментот тече рокот за жалба по донесената Одлука, поради што, се уште не е склучен Договор со ниту еден економски оператор.

Од кога ќе се склучи договорот за  новогодишно украсување, ќе бидат прецизирани сите детали, како што се цената, рокот, времето на исполнување и економскиот оператор. До тој момент, односно, до конечното завршување на постапката по јавен оглас бр.18094/2020 не може да се даваат изјави во јавноста по ова прашање, ниту да се коментираат сегменти од постапката како конечни кога не се и се уште е во тек рокот за поднесување на жалба.

Поради зголемениот интерес на јавноста, од една страна, како и стремежот за транспарентност на општината од друга страна, Општина Струмица ќе достави дополнителни детали за новогодишното украсување на градот, но по конечност на сите донесени одлуки и склучување на договор со најповолниот економски оператор, стои во известувањето од Општина Струмица.