Одбојкарите на Струмица 47&72 се на чекор до одбрана на титулата
Одбојкарите на Струмица 47&72 се на чекор до одбрана на титулата
Одбојкарите на Струмица 47&72 се на чекор до одбрана на шампионската титула во Првата машка лига, откако со победата од 3:2 (25:11, 19:25, 25:22, 13:25, 15:13) над Штип УГД, вечерва, пред својата публика во салата „Парк“ дојдоа до предност од 2:0 во финалната серија.
Бранителот на титулата имаше фуриозен старт на мечот со доминантна игра во првиот сет, каде клучна беше серијата од 8-1 која донесе убедлива предност (18:6), која овозможи со рутинска игра струмичани да поведат со 1:0.
Штип УГД во стартниот период делуваше како да се бара на теренот во салата „Парк“, а редовите успеја да ги консолидира во вториот сет, кога негативата од 4:2 ја претвори во водство од 4:7, кое не го испушти до крајот и со 19:25 изедначи на 1:1.
Третиот сет понуди најголеми возбудувања. Струмица диктираше темпо до 10:7, но Штип изедначи на 10:10, а потоа поен за поен се играше до 21:21. Домашните имаа прво водство од два поени, 23:21, а како пресудно за да го освојат сетот беа двете технички грешки во финишот на штипјани, за 25:22 и водство од 2:1.
Предизвикувачот повторно ја смири играта и влезе сигурно во продолжението (1:5, 7:15) користејќи ја комплетно кризата во редовите на шампионот. Струмица остави да „помине“ сетот и се подготвуваше за тај-брејк.
Струмичани во решавачкиот сет влегоа со водство од 6:3, но Штип УГД одговори со 0-4 серија за 6:7. Следуваше нова егал серија, која траеше до 13:13, а во која одлучуваа нервите, но и тоа кој тим ќе направи помалку грешки. Во овој случај тоа беше Струмица, затоа што Штип УГД имаше дури осум технички грешки во клучниот сет. Со 15:13 бранителот на титулата дојде во важна победа и има шанса во три натпревари да ја затвори финалната серија и да дојде до 12. шампионска титула во клупската историја.
Струмица во овој дуел ја предводеа Кинтеро со 17, Нилсен со 16 и Милев со 13 поени, додека кај Штип УГД Задмард постигна 18, Багаев имаше 16, додека Гомез реализираше 15 поени.
Третиот натпревар од финалната серија се игра на 1 мај, во 19 часот, во салата „Јордан Мијалков“ во Штип.
Извор: Одбојкарска федерација на Македонија
