Почна изградбата на првиот булеварски мост во Струмица

Општина Струмица почна со изградба на најголемиот и најмодерен мост на реката Водочница на трасата на булеварот „Братство Единство“ во урбаниот дел од градот. Мостот на река Водочница е прв булеварски мост кој ќе биде изграден во историјата на Струмица, вреден 30 милиони денари, средства обезбедени од буџетот на општина Струмица.

Според градоначалникот Костадин Костадинов, мостот „Обединување“ е најзначајниот проект за отворање ново грло во градот и развој во тој дел и основа за реализација и на новиот градски пазар кој е во фаза на проектирање.

-Мостот е со должина од 15 метри на еден распон и ширина од 23 метри, односно, булеварско решение со две посебни коловозни сообраќајни ленти од по 7,5 метри, тротоари од двете страни по 3 метри и среден слободен простор помеѓу двата коловоза од 2 метри. Реализацијата на овој сериозен капитален проект е во вредност од 30.000.000 денари и целосно е финансирана од буџетот на општина Струмица, а рокот за изведба е една година, информира струмичкиот градоначалник.

Изградбата на овој мост е од големо значење за Струмица, бидејќи истиот претставува предуслов за изградба на булеварот „Братство Единство“, булевар кој што е дел од мојата предизборна програма.

Исто така со реализацијата на овие два проекти, ќе се овозможат услови за отпочнување на реализација на проектот – нов пазар во овој дел од градот, за кој што во моментот општина Струмица е во постапка на изработка на проект и комплетирање на целокупна проектно техничка документација.