fbpx

Протест на земјоделци од Струмичко заради ниската откупна цена на зелката

 Протест на земјоделци од Струмичко заради ниската откупна цена на зелката

Со протест со трактори по улиците на Струмица и едночасовна блокада на крстосницата кај ТЦ „Глобал“ производители на пролетна зелка од повеќе села од Струмичко го искажаа својот револт заради ниските откупни цени.

Тие побараа зелката да не се откупува под 30 денари за килограм, како и итна средба со министерот за земјоделство, Љупчо Николовски и Инспекторатот за земјоделство.

Земјоделците реагираа дека договореното од последната средба со откупувачите и Инспекторатот за земјоделство, зелката да се откупува по 20 денари за килограм во текот на оваа седмица согласно законот не се почитува, а денеска откупната цена е 15 денари.

-Бараме итна средба со министерот која ќе се одржи најдоцна до недела и доколку не се случи тоа тогаш ќе го радикализираме протестот со блокирање на патишта, беше кажано на протестот.

Производителите на пролетна зечка се пожалија дека дел од трговците прават манипулации при откупот, односно се пишува дека зелката се откупува по 20 денари, а се намалуваат килограмите на откупеното и зелката се исплаќа по 15 денари за килограм. Затоа, земјоделците бараат реакција од надлежните за да се спречат таквите манипулации.

Share via
Copy link