Жители на Вељуса со протест и блокада против зачестените кражби на нивите

Денеска жители на селото Вељуса со мирен протест и блокада на влезот на селото го искажаа својот револт од зачестените кражби на нивните ниви и штетите кои им ги предизвикуваат крадците.

Според нив, сторители на кражбите се група жители од селото Баница, но се сомневаат дека меѓу крадците има и нивни соселани.

-Не само што ми се обрани црешите, туку искршени се и дрвјата, а често пати сме принудени сами да се браниме, бидејќи крадците доѓаат со вили и стапови, а имаше и неколку физички пресметки, рече Златко Станков, еден од поголемите производители на цреши.

Велат дека проблемот трае со години и досега не е најдено решение. Бараат преку дебата со надлежните институции да најдат решение, а ги повикуваат и пратениците од струмичко да им помогнат со измена на законските решенија.

Се пожалија дека заради кражбите и нападите не можат сами да одат на нивите и затоа бараат од надлежните институции итно да преземат мерки.