Градоначалникот Костадинов со министерот Бочварски извршија увид во изведбата на канализацискиот систем во Банско

Со министерот за транспорт и врски и мојот драг пријател, Благој Бочварски, денеска, го посетивме населеното место Банско за да видиме до каде е изведбата на фекалната канализација, објави градоначалникот Костадинов.

-Задоволен сум од досегашниот тек, во којшто се реализирани 10 илјади метри, остануваат уште 2,5 километри до конечната реализација. За да биде комплетен овој систем ќе изградиме и Пречистителна станица за третман на фекалните води пред да бидат пуштени во реката Водочница со што ќе ги решиме долгодишните проблеми на жителите во Банско.Целиот проект чини 42 милиони денари и е плод на таа симбиоза и соработка што ја има општина Струмица со централната власт, во овој случај со Министерството за транспорт и врски.Јас сум убеден и ги уверувам граѓаните дека само доколку постои таа симбиоза што ни се случува овие години, ќе реализираме бројни проекти коишто се суштински, важен интерес за сите граѓани на општина Струмица, напиша Костадинов.

-Најавувам и еден важен, капитален проект за населеното место Градско Балдовци, коешто е мое изборно ветување и проблем за жителите, а тоа е дека оваа година ќе започнеме со реализација на фекалната и атмосферската канализација. Според првичните проценки проектот е вреден околу 80 милиони денари и важно е да знаат граѓаните каде завршуваат нивните пари и дека и општинската и централната власт точно знаат како домаќински да менаџираат со средствата на граѓаните, објави градоначалникот Костадинов.