„Комуналец“ поставува контејнери и дели канти за селектирање на отпадот
„И ѓубрето чини пари“ – победничка сторија на вториот натпревар за зелена економија
Телевизиската сторија „И ѓубрето чини пари“ од авторот Зоран Ѓорѓиев победи на вториот повик за новинари и медиуми за истражување и промовирање на најдобри примери од примена на зелена економија или еколошки безбедни рурални деловни практики. Натпреварот се организираше во рамки на проектот „Вмрежување и застапување за зелена економија“ (Networking and advocacy for green economy) финансиран од Европската Унија.
| Во победничката сторија, дописникот на телевизија Сител од Струмица, ја обработува успешната приказна за создавање органско ѓубриво од растителен отпад на Цветанчо Ѓоргиев од Ново Село. Овој струмичанец, наместо да го фрла отпадот, го собира и создава компост во својата семејна фирма. Како суровини, Ѓоргиев користи класно цветни растенија, како што се трската и шамакот, со што оневозможува несовесни граѓани да ги палат и дополнително да го загадуваат амбиенталниот воздух. Компостарата работи четири години на околу четири хектари и е единствена во југоисточниот дел на земјава. Годишно, во просек, произведува околу пет илјади метри кубни сертифициран органски компост. Ѓорѓиев во својата сторија цитира и истражување на здружението „Хорти Еко“, според кое над 53% од земјоделците во нивната работа применуваат добри земјоделски практики. Најголемиот дел, земјоделскиот отпад го заоруваат, и иако малку, сепак има и такви кои компостираат. На тој начин добивале пониски производствени трошоци, но и поквалитетен и поконкурентен производ. Според регионалниот план за управување со отпад во Југоисточниот плански регион, количините на биоразградлив отпад се проценуваат на околу 22 илјади тони годишно или 45% од вкупната количина на комунален отпад. Пристигнатите новинарски стории ги оценуваше тричлена комисија, составена од двајца новинари и еден претставник на Мрежата за Рурален Развој на С. Македонија (МРР на СМ). Притоа, комисијата оценуваше методологија на истражување (истражувачкиот концепт, тема, извори, новинарски алатки), потоа стилот на новинарско изразување, релевантноста на темата и придржувањето до новинарските и етичките стандарди (присуство на факти, точност и веродостојност на наводи). Победничката сторија може да ја погледнете на следниот линк: https://sitel.com.mk/cvetancho-gjorgiev-od-strumica-zarabotuva-preku-prerabotka-na-gjubre |
