Тринаесет години Комора на овластени архитекти и овластени инженери

Комората на овластени архитекти и овластени инженери, денеска, прослави 13 години од своето постоење. За претседателот на Комората, професор д-р Миле Димитровски, оваа година е година на прилагодување и изнаоѓање нови форми на работа со членството. Комората додели именувани награди и плакети на одредени членови.

„Како да не постоеше пандемија за Комората. Бргу се прилагодивме на состојбите и ја префрливме целата работа во електронска форма. Членството не почувствува некој застој. За нас, пандемијата беше прашање на нов пристап кон работата и нова организациона поставеност. Списанието излегува редовно, обуките за континуирана професионална доедукација се одржаа со електронска платформа. Сепак, бројот на активни членови опадна, како последица на застојот во стопанството и економијата. Ќе продолжиме да бараме нови форми за работа и соработка и ќе бидеме инвентивни да не се почувствува никаков застој. Ја продолживме и меѓународна соработка“, вели Димитровски. 

Претседателот на Комората и ректорот на УКИМ „Св. Кирил и Методиј“, професор д-р Никола Јанкуловски потпишаа Меморандум за соработка.

„За истакнување е дека Универзитетот Св. Кирил и Методиј во Скопје и Комората и досега соработуваа за повеќе прашања од инженерството. Со потпишување на меморандумот се остварува можност за посилна институционална соработка на многу полиња од обостран интерес. Ингеренциите на Комората да издава јавни овластувања на инженерите за вршење професионална дејност поврзана со Законот за градење, ја прави стратегиски партнер на дипломираните инженери, кои како дипломирани студенти излегуваат од нашиот Универзитет“, додаде Јанкуловски.

Комората, по повод својот 13-ти роденден, додели именувани награди и плакети. Дипломираниот инженер Наки Костов ја доби наградата за градежно инженерство „Александар – Цане Ангеловски“. Архитектот Бесиан Мехмети ја доби наградата за архитектура „Борис Чипан“. Инженерот Миле Дабески, оваа година, ја доби наградата за електротехника „Станимир Јовановски“. Наградата за машинство „Илија Черепналковски“ ја доби машинскиот инженер Раде Јакимовски.

Исто така, Комората додели плакета за особен придонес во областа на енергетската ефикасност на професорот во пензија, Константин Димитров. Дипломираниот електроинженер Владко Тодоровски доби плакета за придонес во развојот и работата на Комората на овластени архитекти и овластени инженери. Постхумнно, благодарница беше доделена и на архитектот Неџади Зулбеари за придонес во областа на планирањето и урбанизмот.