Во младинската Лига на шампионите Брера Струмица против Сараево

Младите фудбалери на Брера Струмица во Лигата на шампиони ќе дебитираат против младинскиот состав на ФК „Сараево“ од Босна и Херцеговина.

Ова е исходот од денешната ждрепка во Нион каде беа извлечени паровите од Младинската Лига на шампиони.

Македонскиот младински шампион, составот на АП Брера Струмица се падна во групата три каде за противници можеше да ги добие младинските шампиони на Казахстан, Молдавија, Ерменија, Беларусија, Грузија, но за противник го доби босанскиот младински шампион ФК „Сараево“.

Првиот натпревар младите струмичани ќе го играат дома на 18 септември, а реваншот е на 2 октомври во Босна. Доколку го помине првото коло во второто противник на Брера Струмица, како младински шампион на Македонија, ќе биде израелскиот состав на Макаби Петах.