„Медија Флеш“ почна со реализација на проектот „Со медиумска писменост до борба против говор на омраза“

Здружението за медиумска писменост „Медија Флеш“-Струмица почна со реализација на проектот „Со медиумска писменост до борба против говор на омраза“, финансиран од Општина Струмица.

Во наредните месеци, преку најразлични активности, главен предизвик ќе ни биде медиумската писменост,  препознавањето на лажните вести, борбата против говорот на омраза и сегрегацијата-теми кои не се доволно обработени.

Секојдневно сме сведоци на спинување, манипулирање со факти, навреди по секаква линија и поделби, со што се искривува вистинската перцепција на младите за реалните нешта и вредностите кои секој млад човек треба да ги има во градење на општества по нивна мерка.

Преку реализирање на проектот „ Со медиумска писменост до борба против говор на омраза“, сакаме да ја зголемиме свеста на младите во општина Струмица за критичко размислување  преку мотивација за креирање на  сопствен став и одговорно изјаснување во јавноста, со користење на  аргументи  и компетентност, препознавање лажна вест и борба против говор на омраза

Планирано е едуцирање на 100 средношколци  за штетното влијание од медиумски манипулации, кои може да доведат до говор на омраза и криминал од омраза во трите средни училишта, а едукацијата ќе ја вршат експерти од оваа област и искусни новинари.

Генерална цел ни е создавање на мрежа од ученици, родители, професори по македонски јазик и литература, социологија, информатика, етика, граѓанска култура, ликовна уметност, педагогија, општински и државни просветни инспектори, новинари и медиуми, граѓански организации  за борба против лажни вести и манипулации како и за градење на критичка мисла. 

Посебен предизвик во реализирањето на целите преставува и моменталната состојба со КОВИД 19 вирусот, но и она што следи по пандемијата, со што дополнително ги насочуваме активностите кон полето на дигитализацијата и онлајн платформите, но од друга страна ќе ги јакнеме капацитетите на младите и граѓаните со цел препознавање на говорот на омраза на новите медиуми, нивна медиумска писменост и градење на општество и индивидуи кои ќе можат да се спротивстават на лажните вести.