„НОВУС“ почна со реализација на два значајни проекти

Центарот за истражување и анализи „НОВУС“ го имплементира проект „Граѓанско сојузништво за репортери без граници“ во партнерство со „Медија Флеш“ – Струмица.

Вкупната вредност на проектот изнесува 6.850,00 евра. Главната цел на проектот е да се придонесе кон создавање на околина за суштинска партиципација на медиумските здруженија како влијателни актери во општеството во поглед на напредокот на слободата на новинарите од Југоисточниот плански регион и нивната безбедност, како и зголемување на капацитетот на граѓаните, посебно на младите во Југоисточниот плански регион, за критичко размислување преку мотивација за креирање на сопствен став и одговорно изјаснување во јавноста, со користење на аргументи и компетентност.

Целна група се новинари и медиуми, медиумските здруженија, граѓанското општество, младите и локалните самоуправи од Југоисточниот плански регион за воспоставување подобра комуникација и соработка во промовирањето на медиумските слободи, како и подигање на свеста кај граѓаните во процесите на одлучување во областа на медиумските слободи и слободно изразување.

Преку овој Проект ќе се зголеми свестта на младите во Југоисточниот плански регион за критичко размислување преку мотивација за креирање на сопствен став и одговорно изјаснување во јавноста користејќи аргументи и компетентност. Исто така, ќе се спроведе истражување за слободата на информирање, ќе се едуцираат околу 60 средношколци за штетно влијание од медиумски манипулации во трите средни училишта во Општина Струмица, ќе се креира видео и аудио материјал за подигнување на капацитетот на јавноста за важноста од медиумската писменост заради избегнување на случаи на медиумска манипулација и препознавање на лажни вести, ќе се поддржат герила иницијативи од млади луѓе кои на креативен начин ќе спроведат активности со цел справување и едуцирање на останатите за бришење на говорот на омраза и поттикнување на младински активизам за развој на заедница без омраза. Ќе биде изработена едукативна брошура за едуцирање на граѓаните за критичко размислување кон информациите кои ги добиваат и како завршен настан ќе се одржи јавна трибина со цел да се поттикне меѓусебна етичка соработка меѓу новинарите и сопствениците на медиуми и портали од регионот.

Проектот „Граѓанско сојузништво за репортери без граници“ е поддржан во рамките на Програмата за поддршка safejournalists.net, финансиран од страна на Европската унија.

Центарот за истражување и анализи НОВУС Струмица од почетокот на Април 2022, па во текот на следните две години ќе биде дел од проектот “Заштита од корупција” кој е финансиран од страна на Амбасадата на Кралството Холандија а спроведуван од Центарот за граѓански комуникации.

НОВУС е една од осумте организации кои ќе работат локално во својата општина на овој проект, кој се спроведува паралелно и во 8 други општини во Македонија, а целта ќе биде намалување на корупцијата и злоупотребата на јавните средства на локалната самоуправа преку зголемување на транспарентноста, отчетноста и интегритетот на локалните институции, како и имплементација на мерките предвидени во Националната стратегија за превенција на корупцијата и судирот на интереси 2021-2025 година.

Заради поефективна и полесна реализација на овој проект, Центарот за граѓански комуникации има потпишано Меморандуми за соработка со секоја од осумте општини, каде спаѓа и Општина Струмица, како локална самоуправа која отворено ќе соработува во текот на целата фаза на имплементација на проектот и истражувањата кои се дел од овој проект, заради утврдување на одредени состојби при користењето на јавните средства и нивно подобрување, од што бенефит ќе имаат сите граѓани.