Детски карневал во Радовиш за традиционaлната „Априлијада“

Радовиш денеска беше претворен во карневал на детската фантазија.Плоштадот „Св.Спасо Радовишки“ личеше на пролетен мозаик и кошница исполнета со разнобојни цветови, бубамари, пчелички, кловнови, волшебници, дизниеви јунаци и многу други маски, коишто денес беа дел од традиционалната „Априлијада“.

Почнувајки со дефиле од бул.Александар Македонски и движејки се кон плоштадот, каде маските имаа свое претставување, и овој пат дечињата и учениците им ги исполнија срцата на сите присутни родители, баби и дедовци, роднини и граѓани.

Во име на градоначалникот на општина Радовиш, присутните ги поздрави секретарот на општина Радовиш, Љупче Почивалец изразувајќи благодарност и упатувајќи честитки до сите учесници за нивната креативност како и до нивните ментори, наставници, воспитувачи и негователи.

Од страна на организаторот на сите учесници кои беа дел од овогодишната Априлијада им беа доделени признанија.