Трета работилница за развојни микропроцесорски системи во проектот „Технологија за тебе“
Ги обликуваме младите средношколски умови за креативно размислување
Трета работилница за развојни микро-процесорски системи се организираше на Факултетот за електротехника и информациски технологии при Универзитетот „Св. Кирил и Методиј“ – Скопје во рамки на проектот „Технологија за тебе“. Организатори на работилницата се факултетот и компанијата Логинг Електроникс и на работилницата учествуваа 30-ученици и 28-професори од девет средни училишта за техничко образование од Македонија: СУГС „Владо Тасевски“, Скопје; СОУ „Ѓорче Петров“, Крива Паланка; СОТУ „Ѓорѓи Наумов“, Битола; ССОУ „Коле Неделковски“, Велес; СЕТУ „Михајло Пупин“, Скопје; ОСТУ „Наце Буѓони“, Куманово; СОУ „Ристе Ристески – Ричко“, Прилеп; СОУ „Ѓошо Викентиев“, Кочани; СОСУ „Илинден“, Скопје, како и стручниот кадар на Логинг Електроникс и професорите од ФЕИТ. Основната цел на работилницата е промоција на електротехниката и давање техничка и професионална поддршка на учениците и професорите од средните стручни училишта во државата.
Работилницата се состоеше од стручни и научни предавања од повеќе актуелни области од електротехниката, натпревар од областа на развојни микропроцесорски системи, презентација на средношколски проекти и најнови технолошки достигнувања во полето на вградливите микрокомпјутерски системи. Во првиот дел од работилницата фокусот на предавањата беше поставен на концептот на отворено образование и примена на машинското учење и науката за податоци во средното стручно образование. Исто така, учениците се натпреваруваа во практична реализација на електронски кола и развојни програмабилни системи, како и преку презентација на разни практични решенија со употреба на опремата донирана од Логинг Електроникс.
На натпреварот за практична реализација на електронски кола и развојни програмабилни системи СОТУ „Ѓорѓи Наумов” од Битола освои прво место. Втората позиција ја зазема ОСТУ ,,Наце Буѓони” – Куманово, додека третото место го доби СОСУ “Илинден” – Скопје. За најдобра презентација на практични решенија со опремата донирана од Логинг електроникс првото место го освои ССОУ „Коле Неделковски” од Велес.
За деканот на Факултетот за електротехника и информациски технологии, проф. д-р Димитар Ташковски, организацијата на овој настан има големо значење за ФЕИТ кој својата општествена одговорност секогаш ќе ја покажува преку активна поддршка на средните стручни училишта. Тој истакна дека целта на ФЕИТ е да ги привлече и да ги мотивира младите ученици да ги продолжат своите студии во областа на електротехниката, а притоа ФЕИТ ќе им овозможи квалитетно образование и можност за нивно професионално усовршување. „Дипломата која ја стекнуваат инженерите на ФЕИТ е меѓународно призната што се потврди и со нашата ASIIN акредитација на студиските програми”, истакна Ташковски.
„Со повторно организирање на работилницата, нашата мисија на подигнување на свеста за употреба на новите технологии во секојдневието e посебно значајно за нас, обликувањето на младите умови во насока на креативно размислување и свесност за неограниченоста на нивниот личен потенцијал продолжува. Како и порано, така и сега сакаме во Македонија да им овозможиме на младите ентузијасти во електрониката и идните инженери да се едуцираат и да користат врвна опрема со помош на квалификувани ментори што има за цел личната сигурносткај учениците да ја дигне до ниводека ја владеат темава, дека можат се“, изјави директорот на Логинг Електроникс, Златко Крстевски.
Оваа година, работилницата за развојни микропроцесорски системи се реализираше преку воспоставената лабораторија за производство на Факултетот за електротехника и информациски технологии ФЕИТ-ФАБЛАБ, кофинансирана од Фондот за иновации и технолошки развој. Вон. проф. д-р Живко Коколански, претставник од тимот на ФЕИТ-ФАБЛАБ, изјави дека лабораторијата за производство внесува нов квалитет во реализацијата на настанот преку користење професионална опрема и наменски изграден простор согласно интернационалните стандарди на ФАБЛАБ. „Ова е прва од многуте предвидени активности на ФЕИТ-ФАБЛАБ која ќе им овозможи на сите млади професионалци, ентузијасти и хобисти да ги реализираат своите идејни технички решенија. Лабораторијата за производство на ФЕИТ е отворена за сите и ќе биде место кое ќе го поттикне развојот на креативноста и иновативноста на младите лица во полето на електротехниката”, истакна Коколански.
